Basobok Jo Urang Minang, Dunia Raso Punyo Awak

Tadi kan awak pai balanjo ka pasa 'Gede Bage', kalau bahaso Minang e 'Gadang Bage'. :D Lai tau sanak ndak, itu pusat tampk manjua barang seken nan paling gadang di kota Bandung, urang biaso e manyabuik 'Cimal'--kepanjangan eCibadak Mall karano pasa ko dulu adoh e di jalan Cibadak. Tu sajak tahun 2000 pasa ko dipindahan ka Gede Bage.

Ado urusan apo yo awak ka pasa ko? pasti sanak lah bisa manakok, kalau awak ka pasa ko nio mambali barang-barang dengan harago miriang. Ndak urang e nan miriang doh yo. :D Jadi ndak sanak ... di pasa ko banyak barang-barang impor nan di jua murah, walaupun alah seken atau alah bekas tapi barangnyo masih rancak. Tu ... barang-barang bal nan di pasa Padang tu , di siko bali e ko.

Ha ... nan ambo tadi nio mambali koper di siko, koper e baru. Jan salah sanak, ndak seluruh nan dijua di siko seken doh yo. Kadai tampek awak mambali koper tadi nan punyo urang Minang kiro e. Tu awak ajak se nyo lai bahaso Minang, nyo lah takok dek wak dari logat e. Takanai murah Uda tu, nyo hagoan e kopernyo ampek ratuih (400), duo ratuih (200) lah cek wak. Awak samo awak ko dek a lo nyeh, kan iko lo ko a. :D Nyo dikicek an e tingga nyo di Tabing dakek rumah awak, tantulah iyo,kanai dando e.

Sudah tu ndak ... wak ka bali samba di rumah makan Padang tapi wak ragu ... bali e dakek kosan atau di siko c yo kicek wak. Di siko c lah ... samba ibuak tadi lamak bantuak e. Tu wak balilah ... hari lah sanjo, ambiak se lah gula sampadeh duo puluah (20) lei kiceknyo. Lauak e tingga duo saiak lei, ikua jo kapalo. Yo lah ... cek wak, bia dapek lo ntuak bisuak. Kiro e ditambah e lo samo samba lado hijau kinco jo  jariang, diagih e lo taruang balado ampek (4) saik. Gratis kicek e. Rasaki anak sholeh(ah). Yo lahelok ibuak ko mah, batarimo kasiah banyak wak, mudah-mudahan lancar rasaki ibuak tu.

Alah ... mode itu se nyo, jadi wak balanjo di Banduang tapi raso di pasa Padang raso e. Nan basobok urang Minang se taruih. Dunia ko nan sampiak atau urang Minang ko nan mamanuhan nagari. Haha.

Foto: dok.pri

Bandung, September 2017